Сайн байнауу?
Гоолингоогийн уншигч та бүхэндээ энэ өдрийн мэнд хүргэе! Би энэ Миний амьдрал буланг байнга уншдаг. Энэ удаа өөрөөзахиа бичихээр шийдлээ. Та бүхэн надад чин сэтгэлээсээ зөвлөгөө өгнө гэдэгт итгэж байна . Бид хоёр их орой гэр бүл болсон. 30 гарсан хойноо бүтээсэн хоёулангийнх нь анхны амьдрал юм.

Манай нөхөр гадаадад олон жил болсон хүн. Би ч бас гадаад сурч, ажиллаж байсан. Суугаад 3 жил болж байна. Нэг ой гарантай охинтой. Охиноо хадам аав ээжээрээ харуулаад би ажлаа хийдэг. Нэг хувийн компанид удирлагын түвшинд ажилладаг. Хоёр ч дээд сургууль төгссөн. Манай нөхөр хуульч мэргэжилтэй боловч таксинд яваад л амьдралаа залгуулж байна. Би олон хүнтэй ажилладаг болохоор өглөө босоод жаахан нүүр амаа янзалж үсээ угаах ч юм уу өөртөө жаахан анхаарал тавих юм бол хэндээ сайхан харагдах гэж алцаганаад байгаа юм гэж загнаж уурлана. Сүүлдээ нуугдаж байгаад нүүрээ будна одоо тайлан балансын үе болхоор жаахан оройтоно. Тэгэхээр энэ гэрт чиний хэрэг байхгүй зайл гээд л хэлэх хэлэхгүй үгээр доромжилно. Нэг л юм асуучих юм бол жишээ нь зурагтаар гарч байгаа хэн нэгнийг л энэ хэн билээ гээд л асуучих юм бол иймхэн юм мэдэхгүй арчаагүй гээд загнаж эхэлнэ. Яхир хатуу өөрөөс нь асуухгүй өөрөө мэдээд гэр орноо цэвэрлэх гэхээр бас л буруудна. Асуугаад хийх гэхээр бас л буруудна. Юм асуулаа гэнэ охиноо өөрийн мэдлээр хөхүүлж чадахгүй. Их хөхүүллээ бага хөхүүллээ гээд л энэ гэрт миний мэдлээр хийгдэх нэг ширхэг ч юм байхгүй.

Нөхөртөө гомдоод нэг хэсэг их уйлдаг байлаа. Ил далд миний нүднээс нулимс унаж байгааг харвал гал дээр тос нэмэхтэй адил юм болно. Үхсэндээ уйлаад байгаа юм? Чи уйлж муу ёрлоод таксинд хүн олдохгүй байна гэнэ. Өнөө өглөө гэхэд өглөө цайгаа ууж чадсангүй. Чи юм идэж яадаг юм гээд идэх гэж байсан юмыг булаагаад авчихсан. Салаад явчих гэхээр өөрийн гэсэн байр орон байхгүй болохоор аав ээждээ төвөг удаад яах вэ, сэтгэлийг нь зовоочих байх гэж бодно. Манай аав хорт хавдартай хэвтрийн дэглэмэд байдаг болохоор гэр рүүгээ явж чадахгүй. Хаачих вэ гэж шанална. Нэг удаа охиноо 9 сартай байхад өөрийнхөө аав ээжийн дэргэд намайг зодсон. Зодсон шалтгаан нь чанга орилоод охин цочоод байна гэж хэлснээс болсон юм. Тэгээд бисалахаар шийдээд тэр өдөртөө аавындаа очсон. Охиноо хувийн цэцэрлэгт өгөөд өөрөө ажилдаа ороод нэг сар орчим болсон. Миний охин ядаж байхад аавдаа их сайн. Ээжээ гэж хэлж чадахгүй мөртлөө л ааваа гэж уйлна. Бие нь өвдөнө, шөнө ч их уйлна. Би өдөржин ажиллаад шөнөжин охиноо тэвэрч сууна. Нэг өдөр ажлаасаа ирэхэд нөхөр маань ирчихсэн, охин маань инээд алдчихсан,халуураад бие нь өвдөөд байсан нь зүгээр болчихсон сууж байсан.Тэр шөнөдөө охин маань уйлаагүй. Охиноо өрөвдөөд буцаад нийлсэн.

Ер нь би олон юм ярьдаггүй нэг их хэрүүл хийгээд байдаггүй. Нөхрөө засрах болов уу яах бол гэж бодох юм. Охиноо бодоод л тэсч, өдөр болгон загнуулж хараалгуулж хааяа нэг цохиулж аваад юу ч болоогүй юм шиг тэсээд л явна. Сүүлдээ гэр рүүгээ явмааргүй санагдах юм. Цаашдаа би яах хэрэгтэй вэ? Би бүр яахаа мэдэхгүй байна. Үнэн сэтгэлээсээ зөвөлгөө өгч туслаач! Яахаа мэдэхгүй байна.

Гэр бүлийн сэтгэл судлалын ухааны доктор, "Сайн нөхөр-аав болох алхмууд", “365 өдөр тэр чигтээ аз жаргал” номнуудын зохиогч Г.Наранбаатар дээрх захидлын эзэнд болон үүнтэй адил асуудалтай тулгарсан Гоолингоогийн бүсгүйчүүдэд ийн зөвлөлөө.

1. Юу тарина түүнээ л хураана гэсэн үг байдаг. Орчноосоо авч буй мэдрэмж нь хүний ухамсарт шууд нөлөөлж байдаг. Таны нөхрийн эргэн тойронд хогийн ургамал шиг амьдрал түүнийг хордуулж эргээд гэр бүлд тань үл ойлголцлыг бий болгож байна. Муу муухайг бодох завгүй ажиллаж амьдарна гэдэг зүгээр нэг гарсан үг биш юм. Нөхрийгөө идэвхитэй байж хүссэн ажлаа хийхийг нь ятга. Мэргэжлээрээ ажиллахад ч буруудах зүйл байхгүй. Харж байгаадаа хариу шууд үзүүлдэг ийм мэдрэмжийг амьдралаасаа зайлуулж, алс ирээдүйгээ харж чаддаг, шатраар бол ухаалаг нүүдэл хийж сургах, дадал олгох амьдралаа өөдрөгөөр харж чаддаг байх хэрэгтэй. Боловсрол гэдэг дипломоор хэмжигддэг зүйл биш. Харин харилцаандаа ямагт бусдыг сонсож хүндэлж чаддаг сэтгэлийн хаттай, эрүүл ухаанаар, эрүүл үйлдэл хийдэг, ХАРИУЦЛАГА хүлээж байгаа шигээ даах гэж амьдардаг төлөвшил чухал юм шүү. Нэгэндээ уурлаж гомддог хэрнээ эсрэгээрээ тухайн нөхцөл тохиолдоход гомдоодог нь л энэ бүхний зангилаа юм. Тиймээс ч олон эмэгтэйн захианд хариу өгөхдөө би зоосны нэг талаас хандахгүй гэдгээ илэрхийлдэгт эрхэм охид бүсгүйчүүд минь битгий эмзэглээрэй. Монгол хүний үнэ цэнэ нь тэдний сэтгэлийн тэнхээ, нэгнээ үнэлэх үнэлэлт юм шүү. Муулж харааж чаддаг шигээ магтаж сайшааж, засаж залруулах гээд зүтгэх тусам та бид бүгдэд нь хамаардаг Монгол хүний үнэ цэнийг өсгөж чадах болно. Танд амжилт хүсье.
Г.Наранбаатар /Гэр бүл, сэтгэл судлалын ухааны доктор/
“Сэтгэлийн өнгө” Гэр бүл, сэтгэл судлалын төв
Цаг авах утас: 99885300
www.facebook.com/setgeliinungu1
www.twitter.com/NaranbaatarDr
Редакцийн зурвас:
Өөрийн амьдрал дахь шийдэж чадахгүй байгаа асуултандаа тохирсон хариулт эрж, бидэнд захидал бичин илгээдгийг чинь мэднэ ээ. Гэхдээ чиний хэнээс ч асуулгүйгээр шийдсэн шийдэл ч зөвлөмж зөвлөгөө болж, дотроос чинь гэрэлтэх аз жаргал онлайн найзуудад чинь эрч хүч болж бас нөхрийн чинь жижигхэн хэрнээ хайрыг чинь татдаг зан чанар сайтыг маань нууцхан уншдаг залууст үлгэрлэл болж чадна гэж бодож байсан уу? Найз бүсгүйчүүдийнхээ таарамжгүй байдлыг хэрхэн эвдэж нэгтгэсэн, мөрөөдлийнхөө төлөө өөрийн гараар бүтээсэн боломж чинь, хайрттайгаа хэрхэн гэр бүлээ төлөвлөж байгаа чинь ч гэсэн олон хүнд мэдлэг, урам зориг бэлэглэж чадна. Тийм болохоор өөрийнхөө туршлага, амжилт, амьдралыг бага гэж гололгүйгээр сайн сайхан түүхээ бидэнтэй хуваалцаарай. Илгээх хаяг Goolingoo@gmail.com шүү. Гоолингоо нь чиний урам зоригийг түгээх гүүр нь болж өгье. Чиний Гоолингоо ХОХО.

Таны хайртай хүнийг лам, зурхайч үзээд тохирохгүй гэвэл та яах вэ?

Тоохгүй. Хөндлөнгийн хүнээр амьдралаа шийдүүлэхийг хүсэхгүй.

Сална. Ийм үгс ихэвчлэн үнэн байдаг шүү дээ.

Ганцаараа шийдэхгүй түүнээсээ асууна. Хамтдаа шийднэ.

Өөр зурхайч дээр очиж дахин лавлана.

Надад өөр хувилбар байна. Сэтгэгдлээр үлдээе.