ЭхлэлЗөвлөгөөСонжооФотоСанал асуулга Дэлгүүр хэсьеБайгууллагуудБрэндүүд

Би амьдралдаа хайртай

Миний амьдрал  | 2012 / 10 / 20

Сайн байна уу Гоолингоогийн уншигч эгч нараа? Би одоо 16 настай. Хүмүүсийн намайг хардгаар ёстой л зовлон үзэж үзээгүй хүүхэд. Зайсанд амьдарч iPhone барьдаг, үнэтэй хувийн сургуульд сурдаг гээд юугаар ч дутаж үзээгүй, хүссэн бүхнээ авдаг тийм охин.

Би амьдралдаа хайртай

Энэ бол хүмүүс намайг хардаг өнцөг, ингэж харагддагтаа ч би баяртай байдаг. Харин одоо би өөрийн мэдэх өөрийгөө танилцуулъя. Би бүх амьдралынхаа туршид мөнгө гэдэг зүйлийг үзэн ядаж өссөн. Гэр доторхи уур амьсгал гэж манайд байдаггүй ээ. Төрөөд 16 жил амьдрахдаа нэг ч удаа гэрээрээ ширээгээ тойрч суугаад хооллож үзээгүй. Орой аав гэртээ орж ирнэ, бүх зүйл нь ширээн дээр бэлэн байна, харин бид өөр өөрсдийн өрөө рүүгээ орно. Аав ээжийг дуудаж ээлжит мөнгний хэрүүлээ эхлэнэ дээ. Тэгээд миний загнуулах ээлж ирнэ. Юу ч болж байсан намайг загнах, хараах нэг шалтаг заавал гарч ирдэг. Согтуу ирж, агсан битгий тавиасай гэж өдөр бүр гуйж айж суудаг. Энэ бол миний өдөр тутмын амьдрал.

Намайг хүмүүс өнгөцөөр хараад дээр айлын эрх танхи охин гэж дүгнэхэд би дуртай. Тийм л харагдахыг хичээдэг учир. Мини нүүрэн дээр ч хэлж байсан үе бий, намайг зовлон мэдэхгүй гэж. Харин би дотроо чи шөнө дунд эмээгийнхээсээ хөөгдөөд, ээжтэйгээ адилхан янхан болоорой гэж хэлүүлчихээд, гэр лүүгээ уйлаад харанхуй шөнө алхаж байсан удаа байгаа юу? Ээжийгээ зовоохгүйн тулд гэртээ юу ч болоогүй юм шиг орж ирж байсан уу? Аавдаа зодуулаад эмнэлэгт хэвтэж байсан уу? 1000 хүүхдээс 3-р байрыг эзлээд гэртээ хүрээд ирэхэд 1т- орохгүй яасан юм бээ гэж загнуулж байсан уу? гэж асуумаар санагддаг ч инээгээд л өнгөрдөг. Учир нь би амьдралдаа хайртай, хувь тавиландаа хэзээ ч гомдож байгаагүй.

Энэ захидлыг өрөвдүүлэх гэж аль эсвэл зовлонгоо тоочих гэж хайртай сайтруугаа илгээгүй ээ. Би ганцхан хүн болгоныг амьдралаа ямар байсан ч хайрлаасай гэж хүсдэг. Хүн болгон өөрийн гэсэн түүхтэй өөрсдийн амьдралтай. Миний амьдралд тохиолдож буй зүйлсийг би хэзээ ч зовлон гэж хэлэхгүй ээ. Учир нь надаас илүү их зовж байгаа мянга мянган хүмүүс бий. Би нэг л зүйлийг ойлгосноо та бүхэнтэй хуваалцах гэсэн юм. Хэрвээ бидний амьдралд гэрэл гэгээтэй нэг ч газар олдохгүй бол бид өөрсдөө тэр гэрэл гэгээ нь болох хэрэгтэй. Энэ дэлхий дээр өөрчлөгдөөсөй гэж хүсч байгаа зүйлсээ бид өөрсдөө өөрчлөх хэрэгтэй. Надад хүсэл мөрөөдөл бий, тэр минь миний замыг гэрэлтүүлж байдаг. Би амьдралдаа хайртай.

Гэр бүлийн сэтгэл судлалын ухааны доктор, "Сайн нөхөр-аав болох алхмууд" номын зохиогч Г.Наранбаатар дээрх захидлын эзэнд болон үүнтэй адил асуудалтай тулгарсан Гоолингоогийн бүсгүйчүүдэд ийн зөвлөлөө:

Дийлэнх хүмүүс бусдын талаар тийм ч сайн мэдэхгүй мөртлөө тухайн хүнийг зөвхөн өнгөн талаас нь дүгнэж, өөрийнхөөрөө бодож түүгээрээ ярьж эхэлдэг. Гэвч тэдний юу бодож, юу ярих нь чухал бус харин тухайн хүн өнөөдөр хэн бэ гэдэг л чухал юм. Хүмүүний амьдралд хамгийн нандин чухал зүйл бол амьдралын үнэ цэнэ билээ. Дээрх захидлын эзэн амьдралын зовлон дундаас жаргалыг олж мэдрэн, хүсэл мөрөөдлөөрөө ирээдүйн замаа гэрэлтүүлж, амьдралын үнэ цэнийг бага насандаа дэндүү сайн мэдэрсэн нь үнэхээр бахархууштай байна.

Хүмүүн бидний амьдралын замд олон арван бэрхшээл, саад тотгор зэрэг хэцүү асуудлууд зөндөө тулгарна. Гэвч тэрхүү хүнд хэцүүг даван туулах эрэмгий зоригтой сайхан амьдралд хүрэх хүчийг бид өөрөөсөө болон эргэн тойрны хүмүүсээсээ авч байдаг.

Өөрт тохиолдож байсан энгийн нэгэн жишээг авч үзвэл: АНУ-д суралцаж байх үед (насны хувьд би хамтран суралцагчдаасаа багаар бодоход нэг үе мултарсан дүү байсан) Ken Wales хэмээх Hollywood-ын амьд домог болсон кино найруулагч хүн намайг урамшуулж хэлэхдээ: “Хэн ч чамайг нас залуу гэж басаж болно. Харин чи өөрийн үг, үйлдэл, үйлс гурваараа бусдад үлгэр дууриал болон амьдарч, бусдыг чихээрээ бус зүрх сэтгэлээсээ сонсож яваарай” хэмээн хэлж байсан удаатай. Энэхүү үгсээс одоо болтол эрч хүчийг авдаг. Тиймээс ч өнөөдрийг хүртэл зөвлөгөө авахаар ирж буй бүхий л хүмүүстээ гэр бүлд тулгардаг хүнд хэцүү бэрхшээлийг даван туулах эрч хүч энерги хайрлаж, амьдралаа удирдан залах ур чадвар олгохыг эрмэлздэг.

Дээрх захидлын эзэнд болон, ижил төстэй амьдралтай хүн бүрт хандаж хэлэхэд хайрын гэрэлт дэнлүү болон амьдраарай. Дэнлүүг бид доош нь бус харин дээш нь тавьж харанхуйг зайлуулдаг. Үүнтэй адил бусдын амьдралд гэрэл гэгээ нь болж яваарай гэж хүсье. Хүний бодол vйлс болдог, vйлс зуршил болдог, зуршил нь амьдралын хэв маяг болж ирээдүйг тодорхойлдог юм шүү.

Гэр бүл, сэтгэл судлалын ухааны доктор:
Г.Наранбаатар

Амьдрал (Тереза)
Амьдрал бол боломж, алдалгүй ашигла
Амьдрал бол гоо үзэсгэлэн, гайхан бишир
Амьдрал бол мөрөөдөл, олж хар
Амьдрал бол сорилт, үзээд алд
Амьдрал бол үүрэг, нэр төртэй биелүүл
Амьдрал бол тоглоом, тоглож наад
Амьдрал бол амлалт, хэлснээ биелүүл
Амьдрал бол гуниг, даван туул
Амьдрал бол дуу, аялан дуул
Амьдрал бол тэмцэл, битгий бууж өг
Амьдрал бол эмгэнэл, үзээд өнгөр
Амьдрал бол адал явдал, туршаад үз
Амьдрал бол аз, алдалгүй атга
Амьдрал дэндүү үнэтэй, бүү балла
Амьдрал бол амьдрал, тэмцэж амьдар

Өдөр бүр баярлах зүйл тохиолддогLike дарж баярлалаа хуудаст нэгдээрэй.

Эх сурвалж: Охид бүсгүйчүүдийн онлайн найз Гоолингоо.мн-д ирүүлсэн захидал
  |  

Сэтгэгдэл бичих

Бусдыгаа хүндэлж эелдэг байгаа танд баярлалаа.

(626)   Хаалтанд байгаа 3 оронтой тоог оруулна уу!

Сүүлийн сэтгэгдэл

Санал асуулга

Таны хайртай хүнийг лам, зурхайч үзээд тохирохгүй гэвэл та яах вэ?


GOOLINGOO.mn © 2011 он.
Сайтын мэдээллийг ашигласан тохиолдолд нэрийг заавал дурьдана.
Утас: 88001760 И-мэйл: goolingoo@gmail.com