ЭхлэлЗөвлөгөөСонжооФотоСанал асуулга Дэлгүүр хэсьеБайгууллагуудБрэндүүд

Миний амжилтанд хүрсэн түүх

Ажил & Мөнгө  | 2012 / 01 / 25

Зориг, итгэл, чин сэтгэл гурав байхад бүсгүй хүнд хийж чадахгүй зүйл гэж үгүй. Үүнийг өөрсдийн амьдралаар баталж яваа, эрэмгий, дайчин, золбоотой Гооингоогийн бүсгүйчүүд амжилтанд хүрсэн бодит түүхээсээ бидэнтэй хуваалцаж байна.

Миний амжилтанд хүрсэн түүх

-Би анх Солонгост сурч байхдаа өөрийн гэсэн бяцхан бүтикийг нээх санааг олсон. Тэр үед би 19 настай, бизнесийн талаар анхны мэдэгдэхүүнгүй, 200 мянгаас их төгрөг гар дээрээ авч үзээгүй охин байлаа. Гэсэн хэдий ч зүгээр л хийгээд үзэхийг хүссэн, найдах юмгүй мөртлөө чадна гэдэгтээ маш их итгэсэн. Хүн болгон намайг жаахан гэж голж байсан ч, би өөрийгөө 30-тай эмэгтэй шиг сэтгэх ёстой гэж шахаж, бүгдийг тооцоолж, хөөцөлдөж эхэлсэн. Аавынхаа таньдаг хүнээс 2 мянган доллар гуйж зээлээд, ээждээ энд түрээслэх байр хайх даалгавар өгөөд, өөрөө тэндээсээ хувцаснуудаа цуглуулж эхэлсэн. Шинэхэн, жижигхэн дэлгүүрт эхний хагас жил орж ирэх хүн цөөтэй байсан ч, би орж ирсэн ганц хүнээс, манай хувцсыг магтсан нэг үгнээс урамшдаг байсан. Ер нь ямар ч ажил хийхэд өөрийгөө урамшуулж байх маш чухал юм билээ. Анх удаа алдагдалд орж үзэхэд өдөржингөө уйлж байсан ч, дараа нь алдагдал гэдэг зүйлтэй эвлэрч найзалж эхэлсэн. Том амжилт их бага хэмжээгээр золиос шаарддаг гэж бодсон юм. Одоо би 23 настай. Магистрт сурахынхаа хажуугаар дэлгүүрээ ажиллуулж, тийм ч их цаг зарцуулахгүйгээр дажгүй орлого олдог. /23 настай М/

-Гоолингоогийн охид бүсгүйчүүддээ би ажлаа явуулдаг арга барилаасаа хуваалцмаар санагдлаа. Би бүх хүмүүсээ чин сэтгэлээсээ хайрлаж, ойлгохыг хичээдэг. Өөрийнхөө хэлтсийн ажилтнуудыг, захирлаа,тогооч, цэвэрлэгчээ хүртэл. Бас ямар ч үед тэдний байранд өөрийгөө тавьж бодохыг хичээдэг. Компанийхаа ажлыг өөрийн бизнесээ явуулж байна гэж бодоод чин сэтгэлээсээ хичээдэг. Гаднаас ирж байгаа харилцагчаа ч гэсэн сайн найзаа ирж байна л гэж боддог. Ингэлээ гээд хэлтсийн ажилтууд даварч, би өөрөө ядарч, хүмүүс намайг ашиглах гэж оролддоггүй. Харин ч намайг хүндэлж, харьцахад илүү хялбар болдог. Ийм орчинд ажлаа явуулдаг болохоор ажил гэдэг хүмүүсийн ярьдгаар "ял" юм шиг санагддагүй, өөрийн "хобби" юм шиг л бодогддог. Нэг үгээр хэлэх юм бол бүхнийг чин сэтгэлээсээ хийдэг л гэсэн үг юм. Чин сэтгэл гэдэг яг л шавхагдашгүй далай шиг, тарааж өгөөд байхад дуусч дундардаггүй юм шүү. Гэрийн ажилдаа ч гэсэн чин сэтгэлээсээ ханддаг. Хань, үр хүүхдийнхээ оронд дандаа өөрийгөө тавьж боддог минь намайг өдий зэрэгтэй явуулж байгаа гэж боддог. /amidral saihan/

-Би 30 настай, өөрийн гэсэн үсчний салон ажиллуулдаг. Би их сургуульд ордог жилдээ хүүхэд төрүүлээд, хүсч байсан сургуульдаа орж чадаагүй юм. Хувийн сургуульд орох боломж байсан ч, бүх сурах хүсэл эрмэлзэл унтарчихсан байсан болохоор орхисон. Тэгээд л эхний 6 сар юу ч хийсэнгүй, хүүхдээ харж суулаа. Өдрөөс өдөрт зэвэрч байгаа өөрийгөө хараад нэг л өдөр ухаан жолоогүй юм хайж эхэлсэн. Үсчний мэргэжлийг мөнгө бага олдог, дэмий гэж нөхөр маань зэмлэж байсан ч би өдрөөс өдөрт хүмүүсийн гадаад төрхөндөө тавих анхаарал нь нэмэгдэнэ гэдгийг тооцоолоод үсчний сургалтанд явж эхэлсэн. Өнөөдөр би өөрийнхөө доор 3 үсчин бэлтгэж, ажиллуулаад, өөрөө зөвхөн тайлан баланс, орлого зарлага, түрээсээ тооцсон шигээ эрх чөлөөтэй амьдарч, сард сая гаруй төгрөгний цэвэр орлого олж байна. Арван жилдээ би эмч болохыг хүсдэг байсан ба тэр хүсэл минь талаар болоход надад өөр хүсэх тэмүүлэх юу ч байхгүй юм шиг, өөр ямар ч зам байхгүй юм шиг санагдаж байсан. Гэхдээ хорвоо дэлхий дүүрэн боломж юм гэдгийг олж хараад, би эмч болох ганцхан хүсэлдээ баригдалгүй өөрийнхөө зүг чигийг зоригтой өөрчилж, шинэ содон юмыг сонирхож чадсан нь өнөөдрийн минь жижигхэн ч гэсэн амжилтын минь түлхүүр юм болов уу. /30 настай БЖ/

-Нэг хэсэг би ямар ч амьдралын зорилгогүй, хүнийг хүндэлж мэддэггүй, ирээдүйгүй бүрхэг охин байлаа. Эмээгийнхээ ачаар би өөрийгөө огцом өөрчилж, биеэ шургуу дайчилж эхэлсэн. Өөрөө өөрийгөө нээх хэрэгтэй гэдгийг ойлгож, хэрэггүй зүйлсийг зоригтой хаяж чадсан. Илтгэх урлагийн хичээл, загварын дугуйлан, сагсны лигт зэрэг явж, дээр нь ажил хийж, арван жилийнхээ сургуулиас гарсан мөртлөө энэ бүхнийхээ хажуугаар өөрөө өөрийгөө шалгалтанд бэлдээд хүссэн сургуульдаа орсон. Олон юмыг зэрэг хийх тусмаа би бага цагт ихийг амжуулж сурдаг болсон. Одоо би загвар өмсөгч, сагсны улсын лигийн тамирчин, улсын том сургуулийн оюутан, цалинтай ажилтан. Энэ бүхний ачаар би өөртөө ирээдүйгээ өдөр бүр нээдэг, бас юм хийх тусам хүнийг хайрлах, хүндлэх сэтгэлийг олж авдаг гэдгийг ойлгосон. /16 настай Хулан/

-“Хүн ямар ч зовлон зүдгүүрийн давж гарах чадвартайгаар бүтээгдсэн”-Энэ бол миний хэлэх дуртай үг. Миний бодлоор үхэх, төрөх хоёроос бусад бүх юмыг засч, залруулж болдог. Бас өчигдөрийн төлөө харамсана гэдэг шал утгагүй зүйл, учир нь өчигдөр алдсаныхаа ачаар чи өнөөдөр илүү хүчирхэг болсон гэж өөртөө хэлдэг. Миний хувьд, Монголын нэгэн нэртэй компанийн гадаад харилцааны албыг хариуцдаг. Бас тэр компанийнхаа хувьцаа эзэмшигч. Би өнгөрсөн үед өөрийнхөө давж байсан бүх эрсдэлд талархдаг. Хүн өөрийнхөө чадахгүй гэж бодож, эргэлзэж, айж байсан зүйлээ чаддаг гэдгээ мэдрэхэд л амьдралын амт оршдог байх. Би анх их сургуульд орохдоо жаахан л хэцүү санагдсан зүйлээс зугтаадаг байсан. Харин одоо хүмүүсийн боломжгүй гэж хэлж байгаа зүйлийг яаж ийж байгаад болгох гэж оролдох нь надад сонирхолтой санагдах болсон. Жижигхэн төсөл, багахан ажил дээр ч өөрөө өөрийгөө алхам тутамдаа ялан дийлж, айдсаа даван туулснаараа надад одоо хэцүү санагдах юм юу ч үгүй болсон. /33 настай Ө/

Бид бүх бүсгүйчүүдийг амбицтай, дэвшилттэй, эрч хүчтэй байгаасай гэж хүсдэг. Чамд ч бас бидэнтэй хуваалцах амьдралын туршлага, амжилтын түүх бий биз дээ? Сэтгэгдлээр үлдээгээрэй.

Өдөр бүр баярлах зүйл тохиолддогLike дарж баярлалаа хуудаст нэгдээрэй.

Эх сурвалж: Охид бүсгүйчүүдийн онлайн найз Гоолингоо.мн
  |  

Сэтгэгдэл бичих

Бусдыгаа хүндэлж эелдэг байгаа танд баярлалаа.

(277)   Хаалтанд байгаа 3 оронтой тоог оруулна уу!

Сүүлийн сэтгэгдэл

Санал асуулга

Таны хайртай хүнийг лам, зурхайч үзээд тохирохгүй гэвэл та яах вэ?


GOOLINGOO.mn © 2011 он.
Сайтын мэдээллийг ашигласан тохиолдолд нэрийг заавал дурьдана.
Утас: 88001760 И-мэйл: goolingoo@gmail.com