ЭхлэлЗөвлөгөөСонжооФотоСанал асуулга Дэлгүүр хэсьеБайгууллагуудБрэндүүд

Жирэмсэн болсондоо баярлах 29 шалтгаан

Эрүүл мэнд  | 2011 / 11 / 17

Бидэнд бүгдэд нь хөл хүнд байх үедээ “Дахиж л жирэмслэхгүй юм шүү” гэж бодогдох үе байдаг. Магадгүй хоол хараад огиулахдаа, цүдгэр гэдэстэйгээ арай хийн сууж босохдоо та бага зэрэг бухимдаж мэднэ. Тиймээс жирэмсэн байна гэдэг тээр зовлон биш ховорхон олдох жаргал гэдгийг танд дахин сануулах гэсэн юм.

Жирэмсэн болсондоо баярлах 29 шалтгаан

1. Эхний хэдэн долоо хоногын турш, олонд зарлаагүй байх хугацаандаа та хоёр хоёулахнаа л тэр нандин, сайхан тохиолын талаар мэдсэн байх болно. Бусдаас нууцлах тэр амтат мөчүүд ямар их жаргалыг авчирна гээч?

2. Танд хүүхдээ мөрөөдөж, төсөөлж, үрийнхээ төлөө баяртайгаар төлөвлөгөө гаргах бүтэн 9 сар байна.

3. Жирэмсний хувцас сонгох мөчүүд. Өөр ямар ч хувцас таныг илүү өхөөрдөм, илүү гоо үзэсгэлэнтэй харагдуулж чадахгүй.

4. Танд одоо өөрийгөө эрхлүүлэх сайхан шалтаг бий боллоо. Анхилам үнэртэй бүлээн баннанд хэдэн цагаар ч хамаагүй хэвтэж, үрээ тээж байгаа хэвлийндээ зөөлөн иллэг хийж, хайраа мэдрүүлэхийн жаргал.

5. Гэр бүл, найз нөхөд, хамаатнууд чинь бүгд л танд өмнөхөөсөө илүү анхаарал тавьж, таныг хүндэлнэ. Хайрт чинь хүссэн бүхнийг чинь билүүлэхэд бэлэн байх болно. Зам гарахад хүртэл, жолооч нар инээмсэглээд таны төлөө дуртай нь аргагүй зогсоно.

6. Таныг гэр бүл, найз нөхдөөс гадна, төр хүртэл тусгайлан халамжлах болно.

7. Жирэмсэн байна гэдэг жин нэмэх тусмаа баярлах бүсгүй хүний ганц боломж.

8. Хэрэв энэ таны анхны хүүхэд бол, дараагийн 9 сард үд хүртэл хүссэнээрээ унтаж аваарай. Учир нь танд дараа нь тэгэх боломж тун цөөхөн гарна.

9. Олон, хөөрхөн хөхний даруулганууд шинээр худалдаж авах сайхан шалтаг.

10. Та саяхан нярайлсан хамаатныхаа эгч нартай өөрийн мэдэлгүй улам дотносох болно. Баяр хүргэе, та ээжүүдийн клубт үнэгүй элсчихлээ!

11. Сайхан мэдээнийхээ талаар дотны хүмүүстээ хэлэхэд тэдний царай нь хэрхэн гэрэлтэхийг та харах юм бол...

12. Шинэ чадваруудад суралцана! Оймс нэхэж, янз бүрийн хүүхдэд ээлтэй хоол хийж сурах гээд л...та нэг л мэдэхэд төрөл бүрийн шинэ зүйлийг туршиж үзэхийг хүсч байгаагаа мэдэрнэ.

13. Та өөрийнхөө ээжийг одоо л бүрэн ойлгож эхэлж байна.

14. Хүүхдийнхээ өрөөг чимэглэж бэлдэнэ гэдэг танд шинэ даашинз сонгохоос ч илүү баяр баясгалан авчирна.

15. Хүүхдийнхээ анхны хөдөлгөөнийг мэдрэх тэр мөчид, та өөртөө итгэж чадахгүй болтлоо их баярлана.

16. Хайртыгаа шоколадтай давхар зайрмаг, шарсан тахианд “зарах”-даа та анх удаа л тураах дэглэмийн талаар огт бодохгүй.

17. Магадгүй таны эцэг эх, өдийг хүртэл хадгалсаар ирсэн таны анхны бойтог, тоглоомыг гаргаж ирээд, бэлэглэнэ байх.

18. Хайрттайгаа өөрийнхөө болон хүүхдийнхээ эрүүл мэндийг бодоод аль болох олон удаа та цэвэр агаарт гарч, зугаална. Байгальтай илүү ойртоно гэсэн үг.

19. Хүүхэддээ том болсон хойно нь уншуулах гэж жирэмсний тэмдэглэл бичих жаргалтай өдрүүд.

20. Та хөөрхөн цүдгэр гэдсээ илээд, инээмсэглэнгээ зургаа авахуулаарай. Дараа нь ямар том гэдэстэй байснаа хараад та гайхах болно.

21. Хэвлийгээ илэнгээ хайртынхаа тэвэрт хэвтэхдээ та хайр гэгч бүхэл бүтэн шинэ амьдралыг бий болгодог гэдгийг мэдэрнэ.

22. Ирээдүйд юу ч боллоо гэсэн, гараас чинь хөтлөөд түших үртэй болж байгаа гэдгээ мэдэх сайхан.

23. Өдрөөс өдөрт томорч байгаа гэдсээ толинд хараад, тэнд дахиад нэг хүн бий болж байгаа гэдгийг мэдрэх.

24. “Миний охин/хүү ирээдүйд ерөнхий сайд/дуучин/мэс заслын эмч болох болно” хэмээн мөрөөдөх.

25. Сандарсан хоолойгоор “Ус гарчихсан!” гэж утсаар хайртыгаа дуудах мөч ч бас нандин.

26. Дөнгөж төрсөн нялх үрийнхээ нүд рүү харахын төдийд л таны цээж багтамгүй их хайраар цалгиад ирнэ.

27. Мах цусныхаа тасархайг, өөрийнхөө үргэлжлэлийг хараад хайртыгаа яаж баярлаж, хөл нь газар хүрэхгүй шахам болохыг харах.

28. Нярайлсныхаа дараах өглөө нь сэрээд дэргэдээ нялх үрэ эхэвтэж буйг харан “Хөөх энэ бүхэн үнэхээр үнэн юм байна. Би ээж болчихжээ” гэж бодох.

29. Бүх найзууддаа хүүхэд төрсөн гайхалтай мэдээг дуулгаж, таны баяраас хуваалцах тэдний хоолойг сонсох.

Таны хувьд жирэмсэн байхын жаргал юунд оршдог вэ? Бидэнтэй өөрийнхөө туршлагаас хуваалцаач.

Эх сурвалж: Охид бүсгүйчүүдийн онлайн найз Гоолингоо.мн
  |  
Таны орд?
Та Like дарж саналаа өгсөн ч таны санал нэмэгдэхгүй байвал Confirm дээр дарж саналаа баталгаажуулна уу!

Та саналаа өгсөнөөр Facebook дээрээ өөрийн ордны зурхайгаа хүлээн авч байх болно.

Сэтгэгдэл бичих

Бусдыгаа хүндэлж эелдэг байгаа танд баярлалаа.

(690)   Хаалтанд байгаа 3 оронтой тоог оруулна уу!

Санал асуулга

Таны хайртай хүнийг лам, зурхайч үзээд тохирохгүй гэвэл та яах вэ?


GOOLINGOO.mn © 2011 он.
Сайтын мэдээллийг ашигласан тохиолдолд нэрийг заавал дурьдана.
Утас: 88001760 И-мэйл: goolingoo@gmail.com